СЕ НАПАЃА ЕДЕН ОД ГЛАВНИТЕ СТОЛБОВИ НА ОХРИДСКИОТ ДОГОВОР: ДУИ и АА реагираат на најавата за укинување на балансерот

Добивај вести на Viber

ДУИ и АА реагираат на најавата за укинување на балансерот и велат дека се напаѓа еден од главните столбови на Охридскиот договор. 

По најавата за укинување на алатката балансер која денеска ја објави министерот за дигитална трансформација Стефан Андоновски, денеска реагираа опозициските Демократска унија за интеграција (ДУИ) и крилото на Зијадин Села од Алијанса за Албанците (АА). Во одвоените партиски реакции се вели дека со најавите за менување на бројките во балансерот ќе се игнорираат податоците од последниот попис според кој Албанците сочинуваат речиси 30 отсто од населението, а наместо тоа, сега тој процент ќе биде под 25, како на пописот пред 20 години.

„Во меѓувреме, губитниците на изборите и партнерите на Стоиљковиќ, заробени и немоќни, немо набљудуваат, но и активно придонесуваат за секојдневно деградирање на положбата на Албанците. Тоа е јасна последица на тоа што не се избрани претставници на албанската заедница, туку претпочитан партнер на ВМРО ДПМНЕ, ставајќи ги позициите во преден план, иако добија само трошки од институциите одземени од нивните надлежности“, велат од ДУИ. 

Тие додаваат дека нема да дозволат каков било обид за поткопување на достигнувањата на Охридскиот договор. Од Алијанса за Албанците велат дека ова е штетно. 

„Ја повикуваме нелегитимната власт итно да ги прекине овие игри кои ѝ штетат на меѓуетничката кохезија, на правата на етничките заедници и можат да донесат сериозни последици за иднината. Премиерот Христијан Мицкоски, кој прв најави укинување на балансерот, да не мисли дека сите Албанци се како неговите сервили, кои тој самиот ги избра за послушен партнер во неговите застрашувачки проекти“, се наведува во реакцијата на Алијанса за Албанците.

Министерот за дигитална трансформација, Стефан Андоновски, денеска рече дека како што ветиле и во предизборитето, Владата го започнува процесот на укинување на алатката балансер, кој ќе се одвива во фази.

Андоновски најави дека е започната првата фаза од укинувањето на балансерот односно алатката која треба да гарантира правична и соодветна застапеност на етничките заедници во државните институции.

Тој информираше дека сега балансерот ќе важи само за лица резиденти, додека оние кои се регистрирани во странство нема да бидат дел од алатката.

И додека премиерот Христијан Мицкоски најавува целосно укинување на балансерот, владиниот партнер Вреди неколкупати најави дека укинувањето на балансерот ќе биде заменето со закон за правична и соодветна застапеност на заедниците.