Се потпишува петиција за санкционирање на професорката која го оправда тепањето на Шеќеринска

Добивај вести на Viber

Петиција ќе биде испратена до Министерството за образование и наука и СУГС „Раде Јовчевски-Корчагин“ за санкционирање на професорката, Тања Ангова. 

Оваа петиција се потпишува на социјалните мрежи.

Таа на нејзиниот Фејсбук профил го поддржува насилникот кој ја нападна пратеничката Рамила Шеќеринска од СДСМ. Напиша дека тоа што тој го направил било малку и требало повеќе да ја тепа. 

„Како и сите граѓани, така и професорите имаат право на свое лично мислење и слобода на говор, но тоа не подразбира говор на омраза во кој експлицитно охрабруваат насилство и агресија. Бараме одговорност и санкции за оваа професорка која со нејзината објава го одобрува и поздравува насилството кое се случуваше во Собранието на 27.04.2017“- велат иницијаторите на петицијата.

Иницијаторите на петицијата велат дека при вонредна состојба, од професорите се очекува апел за трезвеност и решавање на проблемите по пат на дијалог, толеранција и разбирање, но не и по пат на повикување на насилство.

Кривичникот законик е дециден кога е во прашање „Ширењето на расистички и ксенофобичен материјал по пат на компјутерски систем“, каде не само што опфаќа забрана на јавно ширење преку компјутерски систем на расистички и ксенофобичен материјал туку и на содржини што помагаат, промовираат или поттикнуваат омраза, дискриминација или насилство против кое било лице или група, врз која и да е дискриминаторска основа.

Петицијата покрената пред десет часа и е потпишана од над 3.100 граѓани.