Вучиќ на Путин му подари шарпланинец - чија е оваа раса на кучиња?

Добивај вести на Viber

Српскиот претседател Александар Вучиќ на рускиот колега Владимир Путин при посетата на Белград му го подари шарпланинчето Паша.

Тоа со сигурност ќе си најде посебно место во слободното време и приватниот живот на Путин, бидејќи е познато дека тој е љубител на кучиња.

Неколку државници досега му имаат подарено на Путин кучиња од раси што се симбол на нивните земји. Русинот во многу наврати покажа и докажа дека е страстен обожавател на кучиња кои ги третира со големо внимание.

Но, дали оваа раса е македонска или српска, дилемите ги расчистуваат кинолозите.

„Во Федерацијата за кинологија е дефинирана како двоматична раса, македонска и српска. Нема ништо спорно во тоа што Вучиќ му подари шарпланинец на Путин. Колку е расата наша, толку е и нивна. Шарпланинците кај нас ги има во Овче Поле, на Шар Планина, во Крушево, на Бистра, Маврово. Ние сме ридско - планинска земја, а Србија е повеќе низинска и кај нас овие кучиња ги чуваат стадата“, вели Кирчо Крстевски, претседател на Кинолошко друштво Тумбак од Куманово.

Пред неколку години руски канал снимаше документарен филм во Куманово и околината за оваа раса на кучиња. Во овој документарен филм за расата говореше братот на Кирчо Крстевски, Владимир Крстевски сега веќе покоен. Тој за оваа раса има напишано книга „Македонскиот горостас Шарпалинец“ издадена на три јазици, англиски, македонски и српско - хрватски јазик.

Интересно за рускиот документарен филм е тоа што водителот тргнува од Кратово, за кој кажува дека е стар град, и напоменува дека Александар Велики бил Македонец, како и браќата Кирил и Методи. Така ја почнува приказната за Македонија, и за шарпланинците. Во документарниот може да се видат и македонски села, но и народни носии.