Шкријељ ѝ возврати на Мизрахи: Прочитајте ги законите, па држете пресови
Објавено во: Македонија 09 Јануари, 2020
Не е мирно ниту во Министерството за труд и социјална политика.
Откако денеска Рашела Мизрахи, техничка министерка за труд и социјална политика, ги повика комисите во социјалните служби да почнат да ги изготвуваат решенијата на барањата за помош и нега од друго лице, бидејќи, како што тврди, во овој момент има 11.514 нерешени барања, и возврати дополнителната заменичка за труд од редовите на СДСМ, Санела Шкријељ.
Таа вели дека Мизрахи не ги познава законите, па затоа на денешната прес конференција се повикала на погрешен закон. Според Шкријељ, рокот за постапување по предметите е 60, а не 30 дена, како што тврди Мизрахи.
„Загрижувачко е слабото ниво на познавање на законите на техничката министерка за труд и социјална политика, Рашела Мизрахи. Со денешната прес-конференција таа уште еднаш потврди дека воопшто не го прочитала новиот Закон за социјална заштита и начинот на којшто функционираат 15 комисии. Ако Мизрахи го прочита новиот Закон за социјална заштита, ќе дознае дека рокот за постапување за предметите за помош и нега од друго лице е 60 дена, а не еден месец како што тврди. Мизрахи во својата прес конференција се повикува на погрешен закон, а тоа е Законот за општа управна постапка. Како за појаснување, рокот е утврден во членот 282 од Законот за социјална заштита и тој е утврден на 60 дена“, пишува Шријељ во своето соопштение до медиумите.
Таа потсетува и дека, оваа Влада, како што вели, изгради децентрализирани Комисии за помош и нега од друго лице, за разлика од едната централизирана Комисија којашто беше воспоставена во време на владеењето на ВМРО-ДПМНЕ и им наплаќаше 2.000 денари за поднесено барање.
„Во интерес на граѓаните сега поднесувањето на барања за помош и нега од трето лице е бесплатно, а со тоа што сега функционираат 15 комисии во повеќе градови низ државата услугата е доближена до граѓаните. Ја повикуваме министерката да не наседнува на текстовите кои и ги пласираат од штабот на ВМРО-ДПМНЕ, туку самата да се информира за законите и измените кои се направени“, повикува Шкријељ.