Што му пресуди на Петров: Каква Регулаторна добиваме?

Добивај вести на Viber

Партиски кадар во регулаторни тела – една година по промената на власта, актуелните функционери тврдат дека во клучните тела кои треба да бидат независни седат политичари, блиски до поранешната владеачка гарнитура. За таков се сметаше и составот на Регулаторната комисија за енергетика, барем ако се суди по изјавите на владините претставници. На Димитар Петров сега му дојде крајот. За да замине придонесе и новиот закон за енергетика во кој стои дека мандатот на актуелниот претседател на Регулаторната комисија по автоматизам ќе престане кога законот ќе се донесе.

Рокот требаше да не е подолг од 30 дена, затоа Владата вчера го предложи Марко Бислимоски на местото на Петров, а предложени се и тројца други членови за новиот состав. Бислимоски и досега работеше во комисијата како советник и во јавноста важи за професионалец во енергетската област. Дали ќе остане таков и како претседател, останува да покаже времето.

„Дали ние имаме независна Регулаторна комисија, дали таа комисија која ја води човек којшто претходно бил јасенчлен на политичка партија дава независност. Не. Во моментот Регулаторната комисија е зависна, но од опозицијата“, изјави вицепремиерот Кочо Анѓушев пред донесувањето на законот за енергетика мислејќи на Петров.

Инаку според новата владина одлука освен Бислимоски, за членови на комисијата се предложени и Наташа Вељановска, Атанаско Тунески и Куштрим Рамадани, кој е актуелен член на Комисијата.