Силјановска до Пендаровски на втората ТВ дебата: Бевте во структурите кои го гонеа Руфи Османи

Добивај вести на Viber

Гордана Силјановска Давкова во втората телевизиска дебата помеѓу претседателските кандидати синоќа на МРТ го посочи Стево Пендаровски како член на структурите кои во 90-тите го гонеле Руфи Османи, поранешниот градоначалник на Гостивар, за албанските знамиња и Тетовскиот универзитет.

На ова Пендаровски и реплицираше дека нема допирни дочки со гонењето на Османи и дека тогаш не бил во високите инстанци кои носеле одлуки.

- Мене господинот Османи во 2014 ме пофали и ми даде јавна поддршка кога бев кандидат за претседател на претходните претседателски избори - рече Пендаровски.

Пендаровски ја праша Силјановска зошто прифатила да биде министерка во владата на Бранко Црвенковски од 1992 до 1994 кога знаела дека Македонија е примена во Обединетите Нации под референцата ПЈРМ.

- Сум била против, тоа може да го покажат и стенограмите од владините седници. Но, некој потесен круг имаше ексклузивно право на името и некои од нас тогаш се пожалија дека тоа е нетранспарентен начин. Кога ми заврши мандатот поради тоа реков дека нема да се бавам со политика - наведе Силјановска.

Во делот на економијата, таа побара од Пендаровски да ги наброи имињата на странските инвестиции што влегле во Македонија, на што противкандидатот рече дека не може во тој момент да ги изнесува имињата.

- Пред неколку дена премиерот Зоран Заев изложи цела листа на нови странски инвестиции со име, презиме, земја на потекло и инвестирана сума - возврати Пендаровски.

Силјановска рече дека како научник секогаш ќе ги критикува договорите со Грција и Бугарија, но како политичар мора да ги прифати поради принципот „pacta sunt servanda“.

Пендаровски на крајот рече дека Македонија со Преспанскиот договор, со договорот за добрососедство со Бугарија и со законот за употребата на абанскиот јазик направила таква внатрешна и надворешна кохезија што била призната од светот како најперспективна земја во моментов.