Силјановска, Пендаровски, Река - заевизам, амнестија, патриотизам
Објавено во: Македонија 19 Април, 2019
Еден режим се претвори во друг, заевизмот ме мотивира да се борам -Силјановска Давкова.
Никогаш нема да амнестирам политичари како Иванов со масовната аболиција - Пендаровски.
Албанците се изморени од комерцијалниот патриотизам, чекам гласови од сите - Река
Во интервјуата на кандидатите за претседател кои Фактор ги направи во периодот на кампањата, тројцата зборуваат отворено за ставовите кои ги застапуваат. Силјановска Давкова демонстрира одмереност и смиреност, но со многу емоции зборува за, како што вели, режимот на Зоран Заев.
„Да не беше оваа власт концентрирана во рацете на еден човек и неколкумината околу него, и еден режим да не се претвореше во друг, заевизам кој едно кажува, а друго прави, веројатно немаше ни да бидам толку мотивирана за оваа борба. Ние имаме проблем со персонификација на власта во рацете на неодговорен и некадарен човек, кој не се срами секогаш кога ќе настапи пред странски медиум или форум. Со сиот респект за Стево Пендаровски, сепак противникот кој треба да го ограничиме во вршењето на власта се вика Зоран Заев и СДСМ (заедно со ДУИ), изјави Силјановска Давкова во интервјуто за Фактор.
Стево Пендаровски, пак во интервјуто вели дека Заев воопшто не присутен кај него на начин како што е Христијан Мицкоски кај Силјановска Давкова
„Има голема разлика во присуството на Зоран Заев во мојата кампања и присуството на Мицкоски во кампањата на Силјановска. Ако ја погледнете мојата кампања, ќе видите дека со премиерот имаме неколку заеднички настани, додека сите други денови јас се сретнувам со граѓани на непартиски трибини. Ако ја погледнете кампањата на Силјановска ќе видите дека Мицкоски е носител на таа кампања и дека практично сите пораки се пласираат преку него. Дури и главните спотови одат преку неговите профили. Тој е погласен и поприсутен во медиумите од самата Силјановска и тоа е многу различно од она што се случува во нашиот кампус. Тоа кажува дека Силјановска воопшто не успева да се издвои од партијата иако на почетокот ветуваше и независна кампања покрај партиската, вели Пендаровски за Фактор.
Река во разговорот тврдеше дека тој е кандидат кој ќе се трка и во вториот круг. Вели дека Албанците се уморни од комерцијалниот национализам, или од тендерскиот патриотизам. Рече дека не сите албански партии се националистички партии. Дел од албанските партии, според него, се партии кои сѐ гледаат низ призмата на тендерот и на парите.