Со државата и градот, семејство со двајца средношколци може „полесно да дише“ во септември

Добивај вести на Viber

Денеска започнува новата учебна година, а без помошта што ја обезбедуваат Министерството за образование и Град Скопје едно скопско семејство под претпоставка со двајца ученици запишани во средно училиште би можело да се соочи со  финансиски потешкотии во септември.

Министерството за образование и оваа година обезбедува бесплатни учебнички комплети во средното, како и во основното образование, со тоа што првите во редовна продажба се многу поскапи од овие вторите.

Цените на новите учебници за средно се движат од 250 до 300 денари. За помалите тиражи од 300 до 500 примероци цената е можно да достигне и над 400 денари по учебник, но има и такви кои би чинеле 800 денари доколку мора да се купат. Изминатата деценија беше популарно купување на училишна литература на старо од претходните генерации, со тоа што тие за средно образование беа поскапи и чинеа околу 200 денари. 

Оваа година цените на учебниците во слободна продажба кај издавачките куќи мора да бидат исти со оние под кои се купени од МОН, објави министерот Адеми.

Вчера градоначалникот на Град Скопје, Петре Шилегов, најави дека од оваа година сите средношколци ќе можат да се возат бесплатно во автобусите на ЈСП, вклучувајќи ги и оние што не се подалеку од 2,5 километри од училиштето за кои досега немаше таква привилегија.

Инаку, месечен билет за средношколци според ценовникот на ЈСП треба да се плати 1.050 денари.