Спасовски: 2019 сепак беше економска година

Добивај вести на Viber

Сепак 2019 година беше економска година, рече техничкиот министер Оливер Спасовски денеска презентирајќи ги последните економски показатели. Вели дека сите бројки покажуваат дека тоа е така. Рече дека е добар растот од 3,4 проценти на БДП во последниот квартал лани и смета дека позитивните трендови ќе продолжат

„Владата го презеде управувањето со државата во 2017 година од состојба на рецесија. За неполни 2,5 години направивме пресврт и денес зборуваме за континуиран и стабилен раст на економјата, рече Спасовски, на прес-конференција во Владата.

Министерката за финансии Нина Ангеловска  рече дека растот е солиден, исто како и јавниот долг, но и дека буџетот е стабилен, а приходите добро се реализираат. 

„Буџетот е стабилен и ликвиден. Добриот тренд на реализација продолжи и оваа година, во првиот квартал годинава имаме раст на даноците и придонесите од 8,5 проценти, рече Ангеловска.

Државниот завод за статистика објави дека стапката на невработеност е 16,6 отсто, најмалку досега што ги радува актуелните министри. Ангеловска вели дека е добро што се намалува невработеноста меѓу младите, а постојано растел и бројот на нововработени. 

Според министерот за економија Крешник Бектеши, растот што го забележа градежништвото покажува дека сите проекти се направени врз база на прецизни анализи и штитење на буџетот. Се градат патишта, се реалзира речиси целосно планот за економски раст, вклучувајќи го и Законот за финансиска поддршка и мерките преку ФИТР.