Срби уапсени, па ослободени во Гњилане
Објавено во: Балкан 10 Јули, 2018
Косовската полиција ги ослободи петте Срби коишто утрото беа уапсени во Гњилане под сомнение дека сториле дело против безбедноста на Косово.
Србите се пуштени на слобода по дадените изјави во полицијата. Веста за КТВ ја потврди и јавниот обвинител на Гнилане, Јетош Малоку. Истиот извор наведува дека ослободувањето дојде по острата реакција на Белград, кој се закани дека ако Србите што се уапсени во Косово не бидат ослободени, тогаш Србија веднаш ќе ги прекине преговорите со Косово.
Весникот „Зери“ информира дека директорот за Косово при српската влада, Марко Ѓуриќ, ја пренел заканата на српскиот претседател Александар Вучиќ дека ако веднаш не се ослободат уапсените, се прекинуваат долгорочно преговорите на Белград со Приштина.
„Експрес“ пренесува дека Специјалните полициски сили на Косово ја реализирале акцијата во селото Горно Куфце кај Гњилане во моментот кога со неколку Срби бил и припадникот на срспката војска Ненад Стојановиќ, кој правел обиди Србите во Безбадносните сили на Косово да го напуштат БСК.