Средбата на Трамп и Меркел одложена: Ќе се чека до петок, причина-снегот!
Објавено во: Свет 14 Март, 2017
Средбата на претседателот на САД, Доналд Трамп со канцеларот на Сојузна Република Германија Ангела Меркел, која требаше да се одржи денеска, се одложува за петок поради зимската бура, соопштија од Белата куќа.
„Претседателот разговара со германскиот канцелар, и двајцата се согласија да ја одложат средбата поради временските услови и таа да биде на 17 март“, изјавил Шон Спејсер - прес секретар на Белата куќа.
Сите ја очекуваат оваа средба со нетрпение бидејќи од состанокот на лидерот на САД и лидерката на најмоќната земја во ЕУ зависи какви односи ќе имаат САД и ЕУ, кои важат за големи сојузници.
Дали нивниот однос ќе се влоши или подобри е многу важно и за борбата против терористичките закани кои се повеќе се јавуваат и во САД и во земјите на ЕУ.
Трамп жестоко ја критикуваше нејзината мигрантска политика и дури ја обвини дека ја уништува Германија.
Меркел не му остана должна и му возврати со критики на предложените забрани за влез на мигранти од муслиманските земји во САД.
Посетата на Меркел ќе биде шеста посета на Трамп со светски лидери од инаугурацијата.