Средношколците кај Заев: Ќе има ли промени кај државната матура или камп пред МОН
Објавено во: Македонија 09 Февруари, 2021
Матурантите се вратија на настава со ултиматум барањата да им се исполнат до крајот на февруари, но денеска за тоа имаат средба со премиерот Зоран Заев, потврди претседателот на Сојузот на средношколци Бленди Ходаи. Тие впрочем вчера му пишаа на Заев и побараа да се разговара за државната матура - па сега веќе средбата е закажана за 16 часот.
Ходаи за 24 вести изјави дека имаат поддшрка од 70 пратеници, а дека лобираат да се стави на дневен ред предлог законот за изменување на Законот за државна матура. Тој рече и дека бара да не се политизира нивниот став.
„Денеска ќе имаме средба и со премиерот Заев. Секоја партија ќе се труди да ги партизира нашите барања, но нема да дозволиме партизација. Од 2017 година се трудиме нашиот Сојуз да е далеку од политиката, сакаме само да се бориме за поквалитетен образовен систем. Бараме само од пратениците да најдат решение за тема која засега над 18.000 матуранти“, рече тој.
Инаку во писмото до премиерот побараа да се видат за да му образложат зошто бараат модифицирање на државната матура – намалување на бројот на предмети од четири на два и скратени наставни програми.
„Се надеваме дека сте информирани за ситуацијата околу државната матура и преку медиумите и преку официјалните канали на комуникација. Исто така, се надеваме дека средбата ќе се одржи што поскоро, бидејќи времето истекува, што значи дека треба брзо да делуваме за да го решиме прашањето, напиша средношколскиот Сојуз во писмото што вчера го упати до Кабинетот на премиерот.
Ако не им се исполнат барањата најавија од март кампви со шатори пред Министерството за образование и наука.