Стево Пендаровски: Македонските и бугарските историчари имаа неуспешна онлајн средба
Објавено во: Македонија 04 Септември, 2020
Стево Пендаровски, претседателот на Македонија, во емисијата „Само Интервју“, откри дека во изминатиот период македонските и бугарските историчари оствариле онлајн средба во рамки на Договорот за добрососедство, и покрај пандемијата и изборите во нашата земја, но истата завршила неуспешно.
- Се сопнаа на истите познати камења. Имаа онлајн средба пред месец и половина, но таа не беше успешна, рече Пендаровски.
Шефот на државата коментираше дека источните соседи во моментов се соочуваат со внатрешни политички турбуленции, но политичката комуникација продолжува и дека не очекува од Бугарија да ја блокира Македонија на на првата меѓувладина конференција со ЕУ, која се очекува да започне до крајот на годината.
- Временските термини се знаат, мора да завршат до декември, па и порано. Очекувам за не повеќе од еден месец да знаеме што содржи преговачката рамка. Има формулација дека македонската нација е производ на етнички инженеринг, мислам дека тоа во Европа во 21 век не може да помине кај никого. Секоја земја членка дава свои позиции во преговарачката рамка и да видиме што од тоа ќе влезе како позиција на Република Бугарија, наведе Пендаровски.