СТИМУЛАЦИЈА: Ќе даваат земјиште на семејства со три деца
Објавено во: Свет 01 Ноември, 2018
Италијанската Влада ќе обезбеди бесплатно обработливо земјиште во руралните области на државата, за семејства кои ќе се одлучат да имаат трето дете, пренесе „Еуроактив“.
Властите сакаат да ја запрат растечката депопулација на руралните области, како и напуштањето на обработливите површини.
Сепак, од италијанската опозиција ваквата владина мерка ја оценија како средновековна. Велат дека тоа претставува враќање назад и значи заживување на старомодната реторика за прераспределба на земјиштето.
Овој предлог на италијанската Влада е вклучен во контроверзниот нацрт-закон за буџетот, за кој сè уште се дискутира во италијанскиот Парламент и, како што е наведено, наменета е за поттикнување на социо-економскиот развој на руралните средини, а истовремено и за поддршка на многудетните семејства.
Оваа мерка се верува дека ја предложил министерот за земјоделство, Џан Марко Сентинаио. На иста линија со него е министерката за регионални прашања, Ерика Стефани, и министерот за семејни прашања, Лоренцо Фонтана, поранешен европски пратеник познат по идеите за традиционално семејство.
Во Италија се раѓаат сé помалку деца, а стапката на наталитетот во 2016 година го достигнал историски ниското ниво во земјата чиешто население од година в година старее, соопшти во понеделникот Државното статистичко биро.
Во 2016 година во Италија се родиле 474.000 деца, или речиси 12.000 помалку отколку една година претходно, односно за 2,4 отсто помалку. Стапката на плодноста е во пад за 1,34 шеста година по ред.
Италијанското населени константно старее, имајќи го предвид бројот на родените деца. Речиси секој четврти Италијанец, или 22,3 отсто, е повозрасен од 65 години.