Струјата има предност пред исклучените од парно: До кога ќе плаќаат паушал
Објавено во: Економија 01 Август, 2018
Кратките рокови за да се подготват подзаконските акти кон
Законот за енергетика кои ја регулираат електричната енергија, го пролонгираа
процесот за решавање на ситуацијата со исклучените од парно кои се уште го
плаќаат фиксниот надомест. Претседателот на Регулаторната комисија за
енергетика Марко Бислимовски вели дека веќе во октомври годинава ќе ја имаат и
првичната верзија на Правилата за снабдување со топлинска енергија со кои треба
да се утврди што точно ќе се случува со овој надомест. Дали ќе се укине ќе се утврди откако претходно, тој ќе состави работни групи
на кои ќе се утврдуваат сите детали околу прашањето.
„Имавме кратки рокови за подзаконските акти за струјата. Но во септември ќе направиме работни групи во кои ќе членуваат и претставници од БЕГ, но и од здруженијата кои се незадоволни и исклучени од парното. Очекувам во октомври веќе да ја имаме првичната верзија која ќе ја дискутираме. Тогаш ќе се знае како ќе се регулира, што ќе се случува, вели Бислимовски за Фактор.
Исклучените од парно исто така се надеваат на позитивен исход. Тие до сега го плаќаа фиксниот надомест за топлинска енергија и покрај тоа што не користеа парно.
Кога се носеше законот за енергетика Владата соопшти дека домаќинствата кои се исклучени од централното греење во град Скопје, оваа година ќе бидат ослободени од плаќање на паушалот.
„Имено во подзаконските акти на Законот за енергетика кој ќе се воведе во текот на 2018 година се предвидени специфични решенија со кои во рамките на законската регулатива ќе се реши оваа наследена ситуација“, соопштија лани од Владата.
Сепак тие подзаконски акти се уште не се донесени, а најверојатно примената може да пролонгира уште неколку месеци.
А.Т.