Тереза Меј ја губи популарноста по нападот во Манчестер: Може да се соочи со неуспех на изборите

Добивај вести на Viber

Со 6% се намали предноста на Конзервативната партија на британскиот премиер Тереза Меј над опозициската Лабуристичка партија во пресрет на предвремените парламентарни избори закажани за 8 јуни. Ова го покажуваат резултатите од анкетата на институтот „КомРес“.

Истражувањето, спроведено од 24 до 26 мај за весниците „Сандеј мирор“ и „Индипендент“, покажува дека предноста на конзервативците од 18% е намалена до 12%. Екипата на „КомРес“, кој на интернет интервјуирал 1024 гласачи, соопшти дека популарноста на Конзервативната партија меѓу испитаниците е намалена за 2 отсто, па формацијата веќе ја ужива довербата на 46% од електоратот.

Од друга страна, Лабуристичката партија веќе има 4% повеќе приврзаници и доверба од 34 проценти меѓу испитаниците. 

„Тереза Меј сигурно е категоричен фаворит на изборите, но во моментов не е јасно колку голема победа ќе успее да постигне“, посочува политикологот проф. Џон Кертис од Универзитетот „Стратклајд“. „Веќе не е сигурно дека таа ќе освои мнозинство“, додал тој.

Меј најави предвремени избори за да освои големо мнозинство во парламентот, што ќе им даде повеќе слобода во преговорите за „Брегзит“, и за да добие време за справување со последиците од разделбата со ЕУ. Но, ако не успее да постигне повеќе од сегашните 12 места во парламентот, нејзината одлука за распишување предвремени избори ќе ја одбележи неуспех и авторитетот може да биде ослабен токму за време на почетокот на официјалните разговори за „Брекзит“.