Тевдовски: Расте индустријата, извозот и наплатата на даноци, зошто да правиме ребаланс?
Објавено во: Финансии 05 Септември, 2018
Нема да има ребаланс на буџетот, затоа што клучните економски показатели се мошне позитивни, вели Драган Тевдовски, министерот за финанси.
Тој додава дека засега анализите велат дека нема потреба од такво нешто, затоа што државната каса е во одлична состојба..
- Сите макроекономски индикатори се одлични и се позитивни и се движат во позитивна насока. Индустриското производство објавено минатата недела покажа раст од осум проценти во однос на јули лани, а за седумте месеци од оваа година раст од 5,6 проценти, што покажува дека во 2018 година индустријата сериозно почнува да расте во однос на состојбата во 2017 година. Исто така, извозот е силен и е повисок од 10 проценти по различни месеци, некаде и повисок. Кредитирањето е силно, инфлацијата е целосно под контрола. Потоа кај даноците, кои се најдобриот индикатор дали економските субјекти ја движат економијата и работат, има одлична наплата и сериозно зголемување, согласно проекциите, а некаде и повисоки. Сето тоа укажува дека ликвидноста на буџетот е одлична и веројатно првпат по многу години имаме одлична ликвидност на буџетот и можеме да реализираме се, односно не постои ништо што чека во трезорот на МФ, изјави Тевдовски.
Додаде дека од тој аспект немаме потреба од ребаланс, но, како што посочи, Министеството за финансии навреме ќе ја информира јавноста ако се потребни корекции.