Цементарница Усје: Новите закони за нафтен кокс лошо ќе се одразат врз работењето на фабриката

Законот за измените и дополнувањата на Законот за акцизи што го донесе Собранието на Република Македонија  и кој започна да се применува од 22.11.2014 година, а се однесува на акцизата за нафтен кокс негативно ќе се одрази врз работењето на фабриката Цементарница Усје, смета менаџментот. Со овие измени на Законот се воведува плаќање на акциза од  84,6 ден/GЈ (гигaџул) за  Нафтен кокс(петрол кокс) од тарифните ознаки 2713 11 00 00 и 2713 12 00 00. „Воведувањето на акцизата за петрол кокс, кое нема преседан во земјите на ЕУ, ќе има негативно влијание врз конкурентноста на работењето на фабриката и се очекува да има значаен  ефект врз структурата на трошоци на Цементарница Усје, а со тоа  ќе влијае и врз финансиските резултати во иднина“, потенцираат од Цементарница Усје . Според министерот за финансии Зоран Ставрески кој неодамна објави дека се воведува акциза за нафтен кокс, ваквата мерка ќе го стимулира користењето на енергенси кои помалку ќе ја загадуваат животната средина и ќе се намали загадувањето на воздухот во земјава. Инаку, измените на Законот за акцизи донесоа уште неколку новини. Меѓу другото, се изедначува акцизата по килограм за течен нафтен гас, независно од неговата примена, односно дали се употребува за греење или како погонско гориво. Се пропишува рок од 12 месеци за враќање на платената акциза за докажливо употребен нафтен гас како погонско гориво во индустријата, потоа се овозможува керозинот да има елементи на обележување, а исто така се пропишува и јасна обврска за увозниците за обележувањето на „црвената нафта“. Закон за измени и дополнување на Законот за акцизи објавен е во Сл.весник бр.167/2014 на14.11.2014 година.