Уште четири деца спасени од пештерите во Тајланд
Објавено во: Свет 09 Јули, 2018
Уште четири деца се извадени од подводните пештери во Тајланд, на вториот ден од големата и високоризична спасувачка операција, потврдија тајландските маринци на својот профил на Твитер.
Тие се превезени со воен хеликоптер во болницата во Чијанг Раи и властите не го објавија нивниот идентитет. Децата кои денеска се извлечени се во добра состојба, иако премрзнати. Сите остануваат во изолација во болницата, со цел да се избегнат евентуални инфекции.
Си-Ен-Ен објави дека операцијата е завршена за денеска, што значи дека внатре остануваат уште четворица млади фудбалери и нивниот 25-годишен тренер. И вчера акцијата беше прекината откако од пештерите беа извадени четири деца, со цел да се подготви нова мисија и да се обноват залихите на кислород.
Питер Денис од Британскиот совет за спасување во пештери вели дека нуркачите го вршат најголемиот дел од работата во акцијата, додека децата, главно, се пасивни.