Усвоен деловникот: Артан Груби официјално стана прв заменик на Заев
Објавено во: Македонија 03 Септември, 2020
Премиерот Зоран Заев на свечен чин како прва точка од денешната владина седница им ги предаде мандатните писма на министрите во Владата. Во истите има утврдена мисија и задачи за новиот мандат како новина која Владата сака да ја воведе.
На истата седница како следна точка без приговор беше усвоена измената на деловникот за работа на Владата со која се прецизира дека ќе има прв заменик на премиерот. Таа функција ќе ја има Артан Груби, вицепремиерот за политички систем.
- На парламентарните избори граѓаните избраа да продолжиме да ја движиме државата напред и ние сме обврзани да им овозможќиме поквалитетен живот. Ние имаме обврска да ги исполниме барањата а мандатните писма се нешто што постојано ќе не потсетува за што сме избрани.
Агендата да ја извршуваме со максимален можен напор, без компромиси и оправдувања, бидејќи пред јавноста сме искрени. Граѓаните имаат очекувања а вие сте на позиција да направите се за да ги исполните овие очекувања.
Искористете ги сите потенцијали во јавната администрација, соработувајте со сите и придржувајте се до кодексот за примерно однесување, им порача Заев на министрите.