(ВИДЕО) БЕЗБЕДЕН ВО РУСИЈА: Москва му го продолжи престојот на Едвард Сноуден
Објавено во: Свет 18 Јануари, 2017
Поранешниот службеник на американската Национална агенција за безбедност Едвард Сноуден доби продолжен престој во Русија, објави денес претставничката на руското министерство за надворешни работи.
„На Сноуден само што му е продолжен престојот за уште неколку години“, наведува на Фејсбук портпаролката на руското министерство Марија Захарова, пренесе Ројтерс.
Телевизијата Русија24 јави дека Сноуден останува во Русија уште две години.
Во јуни 2013 Сноуден им предаде на Вашингтон пост и Гардијан низа доверливи материјали за американските и британски програми за следење на интернет. Потоа одлета во Хонг Конг откаде на 23 јуни долета во Москва и престојуваше во транзитната зона на московскиот аеродром „Шереметјево“. Во август добил привремен азил во Русија.
Во САД Сноуден го обвинуваат за предавање на тајни податоци од специјалните служби на други земји и по секоја од три точки му се заканува 10 годишна затворска казна.