(ВИДЕО) ПРАВЕЛ ПОЈАДОК НА БОЦА ВО ВОЗ: Предизвика пожар во кој загинаа над 70 луѓе

Добивај вести на Viber

Во пожар во воз во Пакистан, загинаа најмалку 71 човек, меѓу кои има и деца, а 43 патници се повредени. Пожарот избувнал во возот додека патувал низ провинцијата Пенџаб, на истокот од земјата. Возот се движел од Карачи, а крајната станица требало да биде Рауалпинди.

Од повредените 11 луѓе се во критична состојба. Пожарот настанал по експлозија на плинска боца, која еден од патниците ја користел за подготовка на појадок, што е прекршок за безбедноста на возот. Во пожарот уништени се три вагони.

Пакистанскиот премиер Имран Кан вели дека жали за несреќата и дека се моли за што побрзо заздравување на повредените.

„Наредив итна истрага за случајот“, изјави Кан.

Се очекува дека бројот на жртвите ќе расне. Министерот за железници Шеик Рашед Ахмед изјави дека многу од жртвите загинале при скок од возот. 

Пакистанската железничка мрежа од колонијалниот период последните децении пропаѓа поради недоволно инвестирање и лошото одржување. Во јули најмалку 23 луѓе загинаа во несреќа, а во втора несреќа во септември четири лица. Околу 130 луѓе загинаа во 2005 година, кога воз налета на друга композиција во провинцијата Синд.