(ВИДЕО) Продолжуваат контроверзностите со градоначалникот на Лозово: Неговата ќерка добитник на наградна игра на општината
Објавено во: Македонија 28 Декември, 2020
Градоначалникот на општина Лозово, Ацо Велковски, продолжуваат да го следат контроверзности, откако неговата ќерка стана добитник на шпорет како празнична наградна игра организирана од општината.
„Без лажи и преваре! Ни најмалку ни најмногу шпортетот го доби ќерката на нашиот градоначалник Аце“, рече во еден момент водителката по извлекувањето на наградата по што видеото стана вирално на социјалните мрежи.
Ќерката на градоначалникот рече дека наградата ќе остане во Општината и ќе биде донирана на семејство на кое му е потребен шпорет.
Инаку во самата општина познат е случајот со службеничката Виолета Спасова Колева, мајка на десетмесечно бебе, која до сега шест пати се најде пред дисциплинска комисија во локалната самоуправа и доби отказ додека беше бремена, пред судот повторно да ја врати на работа.
Таа вели дека и натаму нема пристап до работните задачи и дека на 4 јануари повторно ќе се најде пред дисциплинска комисија.
Голем број на вработени се жалат дека трпат мобинг од Велковски уште од неговиот прв ден на функција во 2017та. Со казни и мобинг секојдневно вели дека се соочува и хигиеничарката Снежана Цветковска, која веќе 11 години е вработена во општината, но лани со солзи во очите излезе пред камерите да се пожали.