(ВИДЕО) TИТО ПОЧИНА ПРЕД 40 ГОДИНИ: Eве како беше соопштена веста

Добивај вести на Viber

Пред точно 40 години на денешен ден почина доживотниот претседател на СФРЈ Јосип Броз Тито, а човекот кој таа вест ѝ ја соопшти на Југославија беше спикерот Миодраг Здравковиќ.

„Умре другарот Тито… Тоа вечерва го соопштија Централниот комитет на Сојузот на комунистите на Југославија и претседателството на Социјалистичката Федеративна Република Југославија на работничката класа, работниците и граѓаните, народите и народностите на Социјалистичка Федеративна Република Југославија… Наскоро ќе емитуваме извештај од седницата на претседателството на Централниот комитет на Сојузот на комунисти на Југославија“, изговори Здравковиќ на 4 мај 1980 година малку по 19 часот.

Здравковиќ во таа 1980-та година опишал како се чувствувал кога му била дадена страшната задача.

„На 14 февруари ми беше кажано да не се оддалечувам од Белград и постојано да бидам во врска со телевизијата, со својата редакција. Никој не ми кажа зошто, тоа го насетив читајќи го соопштението на докторите за здравствената состојба на претседателот“, се присетил Здравковиќ.

Денеска се одбележуваат 40 години од смртта на поранешниот претседател на Југославија и борец против фашизмот Јосип Броз Тито. Личност чие име светот го памети и денес. Тажната вест која ја слушнаа граѓаните пред 4 децении, значеше и почеток на крајот на Југославија.

Една од највпечатливите сцени на вест за смртта на претседателот Јосип Броз Тито се случи во Сплит. Во момент на објавата за смртта на Тито на стадионот „Пољуд“ се играше 43.минута од фудбалскиот натпревар меѓу Хајдук и Црвена Звезда, која водеше со 1:0.

Здравствената состојба на Тито се влошила 5 месеци порано, во јануари, кога бил пренесен во болница. Поради проблеми со циркулацијата, пред смртта докторите му ја ампутирале ногата. Во февруари е во кома, а три месеци подоцна починал. Веќе утредента со воз, од Љубљана преку Загреб, во Белград е донесено неговото тело. Три дена подоцна на неговиот погреб присуствувале 700.000 луѓе. 209 од нив врвни политичари од 128 земји ширум светот.

Тито е роден во Кумровец,тогашна Австро-Унгарија, во мешовито хрватско-словенечко семејство, 1892 година. На чело на Југославија беше цели 35 години.

Тој ја предводеше борбата против окупаторот од 1941 до 1945 година, беше долгогодишен лидер на Комунистичката партија на Југославија и командант на нејзините вооружени сили од крајот на Втората светска војна, па сè до неговата смрт.