(ВИДЕО) Вахабисти обучуваат деца во камп во Босна?
Објавено во: Балкан 08 Февруари, 2018
Општинското собрание на Усора денеска ги повикало полициските агенции во Босна и Херцеговина да го истражат делувањето на вехабистичката организација Аскер и обуката на децата спроведена во камп на границата со соседната општина Тешањ, што предизвикало вознемиреност во општината во главно населена со Хрвати.
Се работи за организации кои практикуваат „airsoft", воен симулациски спорт сличен на пеинтбол, во кој се употребуваат реплики на огнено оружје. Притоа навеле дека полициските агенции треба да ги истражат сите околности со оглед на тоа дека објавувањето на видео снимката на која деца се обучуваат од вехабисти во камп предизвикало значајна вознемиреност и реакции кај граѓаните на општината Усора поради можно нарушување на безбедносната ситуација.
На Јутјуб е објавено 12-минутно видео од обука на 30-тина деца, кои биле дел од зимскиот камп во организација на вехабистичката група „Аскер".
За дел од медиумите во Сараево ова е редовен тренинг на деца, но медиумите во Хрватска и Србија информираат дека сето тоа потсетува на воена обука со верска исламска индоктринација.
Директорот на полициската Агенција за истрага и заштита на БиХ, Перица Станиќ, изјавил за медиумите дека оваа агенција ќе преземе мерки во рамките на своите надлежности за утврдување на фактите во овој случај.