Вилма Русковска повторно се кандидира за шефица на Обвинителството за организиран криминал

Добивај вести на Viber

Обвинителката и екс-шефица на Обвинителството за гонење на организиран криминал и корупција, Вилма Русковска повторно се кандидира за да раководи со ова обвинителство. Вели дека очекува поддршка од нејзините колеги.

Таа  денеска изјави дека нејзината суспензија како и поднесената кривична пријава, ги гледа како притисок кон неа и кон сите јавни обвинители за да внимаваат против кого ќе поведат постапка. Русковска даде исказ во Обвинителството, по поднесената кривична пријава за злоупотреба на службена должност при претресот извршен на 18 јули годинава во Управата за финансиска полиција од страна на ОЈО – ГОКК.

„Давав исказ по поднесена кривична пријава од Управата за финансиска полиција за наводна злоупотреба на службена положба и овластување и за наводна фалсификувана исправа. Ова е истрага, а јас бев испитана во својство на осомничена. Очекувам да се отфрли пријавата“, изјави Русковска.

Таа кажа дека не извршила увид во доказите и дека не знае какви докази се собрани освен што знае за делови од предметот што се прибавени од Организиран криминал. 

Пријавата на 8 август ја поднесе Управата за финансиска полиција, а оштетено лице е Арафат Муареми. Беше поднесена до Основното јавно обвинителство Скопје против обвинителките Вилма Русковска, Ивана Трајчева и Елизабета Јосифовска, за „злоупотреба на службена положба и овластување“ за претресот во Управата за финансиска полиција извршен на 18 јули годинава.