ВМРО-ДПМНЕ ќе бара Уставен да се произнесе за Законот за јазици
Објавено во: Македонија 16 Јануари, 2019
ВМРО-ДПМНЕ ќе поднесе иницијатива до Уставен суд за Законот за јазици.
Тој беше објавен во Службен весник без потпис од претседателот, Ѓорѓе Иванов.
Генералниот секретар на партијата, Игор Јанушев денеска изјави дека ВМРО-ДПМНЕ цврсто останува на своите ставови. Тој вели дека промената на името и идентитетот не ги признаваат и никогаш нема да ги прифатат.
„Oд друга страна ќе ги преземеме сите правни механизми во однос на Законот за јазиците и како што веќе најавивме ќе поднесеме кривични пријави за Талат Џафери и директорот на Службен весник, меѓутоа исто така ќе поднесеме иницијатива до Уставниот Суд за преиспитување на уставноста на истиот закон“, вели Јанушев.
Тој рече дека две години живееме во агонија и ја повика власта со претседателските, да распише и предвремени парламентарни избори.
Вчера ВМРО-ДПМНЕ ги повикува сите институции на централно и локално ниво да го игнорираат и бојкотираат операционализирањето на овој неуставен и штетен закон. Рекоа дека доколку одговорните во институциите се соочат со какви било проблеми или закани, ВМРО - ДПМНЕ и правната комисија им стојат на располагање за правна или каква било друга помош.
За овој закон и експертите имаат поделени мислења.