ВО ГОБ „8 СЕПТЕМВРИ“ ПАЦИЕНТИТЕ ДОБИЈА ПОГОЛЕМ ТРИЈАЖЕН ЦЕНТАР: Преместен е на местото на Ургентниот центар
Објавено во: Македонија 04 Декември, 2020
Изминативе денови
е направено големо преместување во Градската болница „8 Септември“, односно
преместен е Тријажниот центар во кој доаѓаат по 150 пациенти дневно, од каде по
направените прегледи се хоспатализирааат или во таа болничка установа, или пак се
препраќаат во останатите ковид-центри.
Директорот на ГОБ „8 Септември“, д-р. Хрисијан Костов вели дека оваа активност во болницата е направена поради тоа што претходниот Тријажен центар беше помал, со тесен ходник и се создаваа гужви.
-Овој исклучително важен оддел го преместивне внатре, каде што беше Ургентниот центар. Претходно се создаваа гужви, пациентите и на ладно чекаа надвор, имавме и некои непријатни ситуации. Сега имаат поголем и поширок простор, и што е најважно не стојат надвор. Ургентниот центар, пак, функционира без никакви проблеми, но е преместен на само 10 метри од каде што беше, вели директорот Костов.
Инаку, засега ГОБ „8 Септември“ не се пренаменува целосно во ковид центар, бидејќи таму редовно се вршат сите прегледи, како и анализи и оперативни зафати и на пациенти кои немаат корона вирус. Инаку, оваа болничка установа и натаму хоспитализира болни од Ковид-19, и тоа како што вели директорот Костов, згрижуваат пациенти со најтешка клиничка слика.
-Во моментов имаме 104 пациенти. Се носат од сите градови во земјава, ако нема место ги препраќаме во другите ковид-центри во Скопје. Имаме навистина пациенти со тешка форма на болеста, во моментов 13 се на респираторни апарати, појаснува Костов.
А.Б.