Во Куманово ќе се гради нов Ургентен центар со најмодерна опрема

Добивај вести на Viber

Министерот за здравство Никола Тодоров најави изградба на нов Ургентен центар во Куманово, а градежните зафати ќе започнат следниот месец. Предвидено е да се обединат интернистичките и хируршките ургентни амбуланти, со најсовремена медицинска опрема која ќе биде примарна за околу 200 илјади жители во регионот.

– Станува збор за комплетно нов објект што ќе биде поврзан со Општата болница во Куманово и ќе се состои од приземје и кат. На приземјето е предвидено сместување на итна хируршка амбуланта, соба за дневна болница, две ортопедски амбуланти, гипс сала, анестезиолошка амбуланта и други придружни простории, додека на катот се проектирани две амбуланти за урологија, една просторија за уролошки интервенции, две хронично хируршки амбуланти, една просторија за интервенции и просторија за компјутерска томографија, како и други придружни простории. Тоа значи дека пациентите на исто место ќе можат да ги добијат сите здравствени услуги и целата потребна дијагностика и третман, рече Тодоров.

Инвестицијата ќе изнесува околу 48 милиони денари со што тендерот е веќе објавена, а до крајот на ноември треба да се склучи договор и да се отпочне со градежни работи кои согласно со договорот е предвидено да завршат за 15 месеци.