Во ВМРО-ДПМНЕ незадоволни од „метлата“ на Заев во СДСМ

Добивај вести на Viber

ВМРО-ДПМНЕ, најголемата опозициска партија во Македонија, излезе со реакција по синоќешните големи кадровски промени во владеачкиот СДСМ, сметајќи дека потпретседателите што ги разреши претседателот Зоран Заев треба да си поднесат оставки и од државните функции. Оставка е побарана и од самиот премиер и од вицепремиерката Радмила Шекеринска.

„Само Зоран Заев и Радмила Шекеринска блескаат. Само тие не се виновни за корупцијата, криминалот, расипништвото и назадувањето на Македонија. Сите останати ги испокрадоа парите преку фондот за иновации, тендерите во здравство, си делат сами на себе кирии, си поделија ниви со марихуана и го соголуваа буџетот. Факт е дека Спасовски, Кирацовски, Ременски, Зекири, Манчевски и Шилегов беа катастрофа за СДСМ но уште поважно е дека тие се трагедија за Република Македонија. Затоа и Спасовски и останатите неспособни кадри на Зоран Заев мора да си поднесат оставки и од државните функции, а не како неспособни партиски кадри да продолжат да земаат пари од буџетот и да ја упропастуваат Република Македонија“, се вели во реакцијата.

Од таму додаваат дека за државата не се значајни толку партиските кадровски промени, колку што се оние државните и се бара разрешување на министерот за внатрешни работи Оливер Спасовски, министерот за информатичко општество и администрација Дамјан Манчевски и од градоначачникот на Скопје, Петре Шилегов.

„Дали да се води едно министерство како МВР е поедноставно и неважно отколку да се биде потпретседател на СДСМ. Доколку Заев не ги разреши Спасовски, Манчевски и Шилегов од функциите ќе биде повеќе од јасно дека така наречената метла е една голема фарса.“, велат од ВМРО-ДПМНЕ.