Возачи, од полноќ има нови цени на горивата
Објавено во: Економија 17 Март, 2022
Од полноќ ќе важат нови цени на горивата. Регулаторната комисија за енергетика(РКЕ) ги објави цените.
Бензините поевтинуваат за два денари по литар, а цената на дизелот се намалува за три денари. Со одлуката се врши намалување на малопродажните цени на нафтените деривати во просек за 3,31 отсто.
Новата малопродажна цена на ЕУРОСУПЕР БС-95 е 79,5 денари за литар, ЕУРОСУПЕР БС-98 ќе се продава за 81,5, ЕУРОДИЗЕЛ (Д-Е V) за 76, а Екстра лесното масло за домаќинство (ЕЛ-1) за 72,5 денари за литар.
За 2,228 денари за килограм се намалува и малопродажната цена на Мазутот М-1 НС и ќе чини 54,521 денари.
Како причина за намалувањето на малопродажните цени на нафтените деривати од РКЕ ги посочуваат намалените референтни цени на нафтените деривати на светскиот пазар кај бензините во просек за 3,573 отсто и кај дизелот за 5,345 отсто, како и за околу 0,182 отсто повисокиот курс на денарот во однос на доларот.