За Бакојани Заев е прозорец на можности?
Објавено во: Балкан 03 Март, 2018
Поранешната министерка за надворешни работи, Дора Бакојани во однос на решавање на прашањето за името, упати остри критики до Владата на Алексис Ципрас за тоа како управува со преговорите.
„Се плашам дека е само уште една можност во синџирот можности што ги изгуби грчката надворешна политика“ - изјави таа.
Бакојани вели дека со сегашниот македонски премиер, Зоран Заев преговорите се полесни отколку со претходниот.
„Дали господинот Заев е прозорец на можност? Според мене, да, беше прозорец на можност, затоа што секој што има преговарано со господинот Груевски знае многу добро колку беше тешко, па и невозможно да се постигне било какво решение со еден радикален националист кој воопшто не размислуваше за било какво решение на проблемот“ - вели Бакојани.
Поранешната министерка за надворешни работи на Грција, а сега пратеник од опозициската Нова демократија, објасни дека припаѓа на категоријата луѓе што сметаат дека треба да се реши проблемот меѓу двете земји, но актуелната грчка Влада „на катастрофален начин управува со прашањето, бидејќи Ципрас ги започна преговорите како лидер на СИРИЗА, а не како премиер“.
„Создаде проблем во внатрешноста на земјата, создаде проблем во преговорите, бидејќи на средина на преговорите се сетија на ерга омнес, на средина на преговорите се сетија дека за да биде ерга омнес потребна е некоја промена во Уставот на соседната земја“ - објасни Бакојани.
Бакојани смета дека справувањето со проблемот треба да започне од основата, која според неа е иредентизмот затоа што „историски, токму врз оваа иредентистичка логика се изгради целата оваа држава“.
За регионот вели дека „без сомнеж, Западен Балкан е црна дупка во Европа“, а недостигот на интерес на Европа во изминатите години го покриле други сили на Балканот. Со големо задоцнување, сепак, Европа, според Бакојани, сфатила дека ова не може да продолжи.