Заев го налути Павлопулос, не сака да слушне за изучување македонски јазик
Објавено во: Балкан 04 Декември, 2018
Нема да прифатиме своеволни толкувања на Договорот од Преспа, изјави претседателот на Грција, Прокопис Павлопулос, на средбата со неговиот словенечки колега, Борут Пахор.
Павлопулос ги коментираше, како што рече „неодамнешните изјави на функционери од поранешната југословенска Република Македонија“.
„Не сме подготвени во пресрет на дефинирањето и пред неговата ратификација да прифатиме толкувања на Договорот од Преспа кои што се своеволни и уште повеќе кога тие зрачат иредентизам. Потребна е голема внимателност од страна на соседната земја во целиот тект бидејќи уште ништо не е завршено. Тоа е јасно од наша страна и ќе кажам уште еднаш, како што велиме ние Грците, чистата сметка, парави добри пријатели“, рече Павлопулос.
Грчкиот претседател ги повтори и неговите позиции поврзани со трите грчки т.н. национални прашања, а меѓу нив и спорот со името и Договорот од Преспа, додека пак претседателот на Словенија го спомена Западен Балкан.
Словенечкиот претседател Пахор, на покана на неговиот грчки колега, од денеска е во дводневна официјална посета на Грција.
Павлопулос рече дека само откако ќе заврши уставната ревизија согласно Договорот од Преспа, тогаш договорот ќе дојде за ратификација во грчкиот Парламент, а соседната земја ќе може да добие покана за членство во НАТО и да започне пристапни преговори со ЕУ.
Рече дека Атина се стреми кон пријателски и добрососедски односи и “во пракса покажува дека ја поддржува перспективата во НАТО и Европската унија”. Но, додаде дека во однос на ова постои еден важен предуслов, решавање на прашањето со името и го спомена Договорот од Преспа.
Тој не прецизираше за што се работи и на што точно мисли.
Премиерот Зоран Заев во саботата од собраниската говорница изјави дека на Македонците во Грција ќе им се помогне со овој договор. Рече дека има шанси да се учи таму и македонскиот јазик. Грчкото МНР подготвува протестна нота.