Заев: Нема да има распуштање на Собранието додека не се изгласаат реформските закони

Добивај вести на Viber

Претседателот на СДСМ, Зоран Заев, денеска рече дека Собранието нема да се распушти предизборно се додека не се изгласаат реформските закони, меѓу кои и тој за Јавното обвинителство.

- Законот за мене е многу важно да се гласа во Парламентот, а тој може да се донесе и да не се донесе - друга опција нема. Ако се обидува опозицијата да го минира, да го блокира на било кој начин неговото донесување, односно гласање, тогаш нормално дека Парламентот нема да се распушти се додека не заврши процесот на изјаснување за Законот за јавно обвинителство, како и протоколот за НАТО, или Законот за одбраната, или сличните закони, рече Заев по сведочењето во случајот „Монструм“.

До првично договореното распуштање на Собранието има уште десет дена, но според Заев, опозицијата ќе мора да соработува во носењето на законските решенија кои ги вара власта доколку сакаат да има парламентарни избори на 12 април.

- Според агендата за која се договоривме сите е дека овие законски решенија до распишувањето на изборите ќе се изгласаат. Ако некој го прекрши тоа, тогаш нормално дека распишувањето на изборите и распуштањето на Парламентот нема да се случи. Убаво е на 12 февруари, како што објави Талат Џафери, тоа да се случи, иако имаме еден резервен период од 15 дена за распуштање, наведе Заев.