Засадени 600-те илјади багреми на автопатот Миладиновци - Штип
Објавено во: Македонија 18 Декември, 2019
Јавното претпријатие за државни патишта информира дека со 600 илјади садници багрем се пошумени косините на автопатот Миладиновци – Свети Николе – Штип со цел да се обезбеди стабилизација и заштита од ерозија, односно лизгање на земјиште.
Станува збор за површина од 30 хектари долж автопатот од 47 километри, кој беше пуштен во употреба во јуни годинава. Багремите требаше да се садат минатата недела, но невремето го одложи настанот. За пошумувањето, што стартуваше есенва, се реализира со 13 милиони денари.
– На останатите, мал број површини со косини, кои е невозможно да се пошумат, односно пошумувањето нема да го даде посакуваниот ефект на стабилизација и заштита од ерозија, со посебен проект ќе се предвидат дополнителни инженерски мерки, како хидрозатревнување, ублажување косини и формирање берми, санација на свлекувања, поставување геонет, жичени мрежи и слично, кои ќе продолжиме да ги спроведуваме во следната година, велат за МИА од ЈПДП.