„Жолтите елеци“ го притиснаа Макрон, еве што им вети
Објавено во: Свет 11 Декември, 2018
Францускиот претседател, Емануел Макрон призна дека земјата е во „вонредна економска состојба“, пренесуваат агенциите.
Земјата ја тресат протести, кои доведоа до милионски штети. Неговото обраќање е последица на протестите кои се случуваат четири последователни викенди и кои почнаа поради најавата за зголемување на данокот на горивата и прераснаа во генерално незадоволство од економските политики за кои демонстрантите тврдат дека ги фаворизираат богатите.
„Денес сме принудени да признаеме. Денес најавувам економска вонредна состојба во нашата земја“, кажа Макрон во денешното обраќање до нацијата и побара „поддршка“ за француската економија.
Минималната плата ќе биде зголемена за 100 евра месечно почнувајќи од мај 2019 година. Тој вети и дека ќе ги укине таксите на прекувремената работа и ќе воведе даночни ослободувања за сите кои заработуваат помалку од 2.000 евра месечно.
Кризата со „Жолтите елеци“ покажува дека Французите сфатија дека нивниот претседател Емануел Макрон е „производ од лабораторија“ создаден за одржување на постоечкиот систем, оцени вчера италијанскиот вицепремиер и лидер на екстремно десната партија Лига, Матео Салвини.