Зошто Владата кратела пари од правосудството?

Добивај вести на Viber

Владата кратела пари од правосудството, а за себе си зела два и пол пати повеќе.

Владата ги скратила парите кои законски им следуваат на судовите и обвинителствата. Ова го регистрирале државните ревизори анализирајќи го буџетот за ланската година. Судската власт добила околу 40 милиони евра, но тоа е дури 63 отсто помалку од законски предвидениот лимит, а не постои никаков документ за причините зошто е тоа направено. Ревизорите констатирале дека на овој начин се создава ризик од непречено стабилно и долгорочно финансирање на судската власт.  Обвинителството  добило само нешто повеќе од 10 милиони евра, што е половина од тоа што им следува. 

„Средствата кои се издвојуваат за финансирање на Судската власт во износ од околу 2,3 милијарди денари претставуваат 0,3 отсто од БДП и истите се за 63 отсто помали од законски утврдениот лимит, додека за Јавното обвинителство одобрените средства во износ од околу 643 милиони денари претставуваат 0,21 отсто од средствата на Буџетот за 2022 година, иако согласно Законот за јавното обвинителство висината на средствата за работа треба да изнесуваат најмалку 0,4 отсто од буџетот на државата, доколку со тоа не се нарушува праведната распределба на буџетските средства“, констатирал ДЗР.

Ревизорите укажуваат дека е потребно да се преиспита актуелниот начин на буџетирање. Македонското судство со години трпи критики дома, но и од меѓународниот фактор.