Јанева бара заштита за свиркачите и соработка со граѓаните
Објавено во: Македонија 24 Март, 2017
Многу е важно да се донесе Законот за заштита на свиркачите, бидејќи тоа е начин да се откријат криминалот и злоупотребата на функциите , како и да се охрабрат граѓаните да бидат будни контролори на власта.
Ова е ставот на учесниците на конференцијата насловена „Ден на слободен говор“ по повод Меѓународниот ден на свиркачите, кој дeнеска се одбележа во главниот град. Специјалното јавно обвинителство постојано укажува на потребата од носење на Законот за заштита на свиркачите.
„Граѓаните сѐ поретко се решаваат да укажат на коруптивно работење и криминал, поради стравот што го имаат од последиците од таквата активност. Затоа ние треба да ги поттикнеме, да ги охрабриме, да пријавуваат такво однесување. Но, проблем е и довербата во институциите, дека и покрај ризикот од укажувањето институциите ќе постапат по законите. СЈО не отстапува и нема да се откаже од истражувањето на криминалот и корупцијата како институција која е одговорна за својата задача. Не смее да се замолчи и да се затворат очите, потребно е истражување на секој криминал, а граѓаните се свесни дека тоа е нешто од заеднички интерес во кој тие се клучниот дел. Свиркачи беа и обвинетите во случајот „Пуч“ , кои преку своите прес-конференции објавија коруптивно и криминално 10-годишно владеење на една власт“– изјави обвинителката Катица Јанева.
Таа ги повикува граѓаните да соработуваат со нив за доброто на сите.