Канализација наместо федерализација во Арачиново

Добивај вести на Viber

Скопско Арачиново, невообичаеното место каде СДСМ доби доста гласови на последните парламентарни избори, како што низ шега се збореше во текот на кампањата, ќе добие канализација наместо федерализација. 

Арачиновци токму по изборите ја изненадија јавноста дека главната причина поради која гласале за СДСМ се локалните проблеми и немањето на канализација. 

Ако ништо друго барем тој дел од очекувањата од новата власт треба да им бидат исполнети бидејќи Министерот за животна средина и просторно планирање Садула Дураки денеска потпиша договор со Друштвото за градежништво, транспорт, трговија и услуги ЈУ-БАЈ од Скопје за изградба на дел од фекалната канализација во село Арачиново во истоимената општина.

Договорот е во вредност од 35 милиони денари.

Изградбата е согласно Основниот проект за фекална канализација во село Арачиново, соопшти Министерството за животна средина и просторно планирање.

Со проектот се предвидува изградба на примарна канализациска мрежа од седум основни и пет помошни краци во должина од 3.030 метри од кои ресорното министерство ќе ја реализира изградбата на Крак 4 и Крак 7.