Ковачевски за предлогот да се смени државниот грб: Опозицијата да ги достави сите предлози

Добивај вести на Viber

Премиерот Димитар Ковачевски и почара на опозицијата дека слободно може да ги достави своите предлози до Комисијата за уставни прашања која ќе биде формирана во Министерството за правда.

Ова го порача премиерот,  одговарајќи на прашањето во врска со предлогот на универзитетскиот професор по уставно право Александар Спасеновски како поранешен пратеник на ВМРО-ДПМНЕ за менување на актуелниот државен грб, што би бил еден вид на консензуален договор со оваа опозициска партија.

– Слободно нека ги донесат сите свои предлози во Комисијата за уставни прашања која ќе биде формирана во Министерството за правда и таму ќе може да се разговара бидејќи гледаме, опозицијата ставовите дневно ги менува, кратко одговори Ковачевски.

Универзитетскиот професор Спасеновски смета дека можеби враќањето на старата дебата од 2014-2015 година за менување на актуелниот државен грб е еден од начините како да се овозможи земање предвид на интересите и заложбите на најголемиот дел од конзервативниот дел од државата, но истовремено да се најде начин како резултат на таквата отстапка да се дискутира со опозицијата и да се обезбеди нејзина согласност околу текстот на уставните измени.

Според професорот Спасеновски, оваа измена би била во светло на декларираната заложба на Владата за унапредување на единството.

Во вестите на ТВ Сител професорот Спасеновски истакна дека можеби треба да се размислува за предлогот за црвен лав на жолта позадина со пет кули, кој во 2014 за државен грб го предложи тогашната Влада на ВМРО ДПМНЕ, а доби и позитивна оценка од ДУИ, но не помина во Собранието.