ЛЕТОТО ЗАПОЧНУВА: Какво време не очекува?
Објавено во: Македонија 21 Јуни, 2017
Календарски започна летото.
Денеска на 21 јуни, во 6 часот и 25 минути, на 172-риот ден во годината, на северната полутопка и во Република Македонија почнува летото. Поради поставеноста на Земјата кон Сонцето, на северната полутопка, оваа среда ќе биде најдолгиот ден во годината (летен солстициум), а на јужната пак, ќе биде најкраткиот ден.
Летото ќе трае 94 дена, а ќе заврши на 22 септември кога почнува есента.
Првиот летен ден во Македонија, според прогнозата на синоптичарите, ќе биде сончев со мала облачност и слаб, претежно северен ветер. Попладне на планините некаде ќе има умерено наоблачување. Максималната температура ќе се движи од 27 до 34 степени, а УВ-индексот ќе има вредност 9.
Од утре деновите ќе почнат да се скратуваат за по 2-3 минути, а за сметка на тоа ќе се зголемуваат ноќите.
Прогнозите укажуваат дека по релативно влажната пролет, летото на Балканот и во Македонија ќе биде доста топло, слично, ако не и потопло од летото во 2012 година.Причина за тоа е глобалната циркулација на воздушните маси и феноменот Ел Нињо, како и локациите на т.н. минимуми и максимуми над Европа и Африка. Особено топло ќе биде веќе од почетокот на јули. Во средината на август ќе има чести појави на жешки воздушни бранови и само неколку дождливи денови. Во северниот дел на Европа, летото ќе биде просечно топло, врнежливо и со чести временски непогоди. Овие прогнози се во согласност со проценките за климатските промени на стариот континент.