Отфрлени 5 од 5 приговори на СДСМ, два се повлечени остана уште еден
Објавено во: Македонија 16 Декември, 2016
Од поднесените досегашни приговори на СДСМ во „игра“ останува уште еден, откако ДИК им одби 5 од 5 разгледани, а самите си повлекоа два приговора за изборна измама, нерегуларности и неточни податоци во гласачкиот материјал. Државната изборна комисија го отфрли и петтиот приговор на СДСМ и Коалицијата, за разликата на гласови во изборното место 1.978 во шестата изборна единица.
За отфрлање на приговорот гласаа 7 членови на ДИК, додека за прифаќање на приговорот гласаа двајца.
Претставникот на СДСМ и Коалицијата во образложението наведе дека на избирачкото место 1.978 имало повреда на законите во однос на гласањето, броењето на гласовите и утврдувањето на резултатите. СДСМ приговарал и во Општинската изборна комисија.
Членовите на ДИК го споредија записникот со доказниот материјал.
Игор Митев од СДСМ побара увид во гласачкиот материјал.
Сашо Срцев од ВМРО-ДПМНЕ рече дека нема разлика меѓу гласачите. Тој се посомнева и во приговорот даден на општинската комисија.
Атанас Урумов, експерт, во својата дискусија не се согласи да се отвори изборниот материјал.
- Се работи за едно гласачко ливче, а за тоа нема потреба ние да вадиме сега доверлив материјал за една корекција. Констатирано е едно ливче помалку – рече Урумов.
Виолета Дума рече дека нема потреба со толку емоции да се расправа за приговорот и забележа на различните аршини на ДИК околу записниците.
- Имаме записник кој е коригиран само од претседателот, но го немаме првичниот записник кој во овј случај не е ист. Постапката ние како ДИК ја прифаќаме и дозволување да прифатиме коригиран записник со печатчина кои се кај претседателот, а реагираме кога политичка партија приговара на ваков записник – рече Дума.
Силвана Бонева забележа дека и овој приговор на СДСМ е доставен откога се виделе резултатите, а преправката на записникот е направена според препораките.
- Десет овластени претставници на партии се потпишале на записникот, а притоа утврдиле дека има утврдено 443 гласови. Кога записникот е потпишан, сите бројки се усогласени. Нема преправки на броевите во записникот – рече Бонева.
Бонева обвини дека приговорот до општинската изборна комисија е лажен и побара да се отфрли приговорот.
Со надгласување беше отфрлен и предлогот да се направи увид во материјалот.