Пратениците денеска завршија со расправа, продолжуваат во вторник
Објавено во: Македонија 12 Април, 2017
Пратениците со работа ќе продолжат по Велигден во вторник.
Претседавачот на конститутивната седница, Трајко Вељаноски во 18 часот ја прекина расправата и 13-тото продолжение на седницата го закажа за вторник, 18 април.
И денеска во Собранието расправата беше слична како и претходните денови.
Пратениците од ВМРО-ДПМНЕ повторно побараа СДСМ да се откаже од платформата од Тирана. Според нив, тоа е најважно за излез од политичката криза или да се распишат предвремени парламентарни избори заедно со локалните.
Крсто Мукоски од ВМРО-ДПМНЕ ги повика колегите да внимаваат како се однесуваат и што зборуваат пред големиот празник Велигден.
Од СДСМ побараа Вељаноски да го почитува Деловникот за работа. Тие обвинија дека им дозволува на репликантите да зборуваат на теми кои не се во допир со точката на дневниот ред – за изборот на Комисијата за прашања на изборите и именувањата.