Милион евра отштета - Семејство на загинат од Љуботен го тужи Тарчуловски
Објавено во: Македонија 11 Декември, 2017
За денеска е закажано ново рочиште во Основниот суд Скопје 2 на кое треба да се расправа за надомест на материјална и нематеријална штета од милион евра, по барање на семејство на загинат во скопското село Љуботен во 2001 година.
Според поднесокот, станува збор за загинатиот Рами Јусуфов, сопруг и татко на четири деца, како и син на тужителите Елмаз и Зенеп Јусуфови. Предметот е проширен и за пратеникот Јохан Тарчуловски кој се наоѓа во притвор. Имено, Тарчуловски не се појави во судот на претходното рочиште.
Тужителите со посебен поднесок побараа тужбата која е веќе адресирана до МВР да биде проширена и за Тарчуловски, зашто со пресуда на Судот во Хаг, тој беше осуден за воени злосторства врз цивилно население.
Тарчуловски во затворот во Шевенинген беше спроведен на 16 март 2005 година по барање на Хашкиот трибунал.
Судот во 2008 година го ослободи поранешниот министер Љубе Бошкоски од обвиненијата за извршени злосторства во скопското село Љуботен, додека, пак, Јохан Тарчуловски беше осуден на казна затвор во траење од 12 години.