Акционерите на Охридска банка ќе добијат акции од Шпаркасе: Почнува процесот на соединување
Објавено во: Економија 07 Септември, 2020
Одлука за почеток на соединувањето на Охридска банка кон Шпаркасе банка ќе донесе Собранието на акционери на Охридска Банка на седницата која е закажана за 5 октомври. Со одлуката следниот месец впрочем ќе се регулираат сите детали од процесот.
Целокупниот имот и обврски на Охридска банка ќе биде пренесен, без да се спроведе ликвидација, во замена за акции на Шпаркасе Банка Македонија АД Скопје.
„Акционерите на Охридска Банка ќе добијат акции од Шпаркасе Банка Македонија АД Скопје во сооднос пресметан во согласност со применливата регулатива и утврден во Спогодбата за присоединување, стои во предлог одлуката за Собранието на акционери.
Инаку Шпаркасе Банка за целите на размената, ќе ја зголеми основната главнина со издавање на акции преку приватна понуда, во согласност со применливата регулатива за статусни промени.
Спогодбата за присоединување
ќе стане полноважна по одобрувањето од Собранието на акционери на двете
банки, а по претходна добиена дозвола за статусна промена од страна на
Гувернерот на Народната Банка. Претходно Охридска банка ќе поднесе барање до Народната Банка за добивање
дозвола за одобрување на статусна промена - присоединување кон Шпаркасе
Банка Македонија АД Скопје заедно со целокупната потребна документација и
во согласност со применливата регулатива, во период не подолг од шест месеци
од денот на донесувањето на одлуката.