Акциска контрола: Кои угостителски објекти ги „чешлаше“ МВР и кој е приведен?
Објавено во: Македонија 01 Јули, 2018
Седум угостителски објекти во главниот град синоќа беа мета на МВР.
При акциска контрола на полицијата легитимирани се над 20 лица а во притвор завршиле тројца.
Како што соопштија од полицијата, периодот кога се одвивала акцијата бил од 01:15 до 03:30 во гостителски објекти сместени во градскиот парк и неговата поблиска околина.
Меѓу приведените е и 44 годишен сопственик на угостителски објект со иницијали О.У а приведени се и 25 годишно момче кај кое е најдено огнено оружје пиштол „Берета“ со рамка со 10 (десет) куршуми и 33 годишниот И.Р. кај кого полицијата нашла прашкаста материја.
Полицијата тврди дека сопственикот на угостителскиот објект кој е приведен одбил да ја почитува наредбата издадена од полициските службеници и се спротиставил на превземање на службени дејствија.
При акцијата затекнати се и шест малолетници кои завршиле во ПС Карпош поради утврдување на идентитет.
Кај пет лица кои работеле како обезбедување било утврдено дека не поседуваат лиценци.
Од страна на Државниот инспекторат за труд, во сите контролирани угостителски објекти констатирано е дека работат без соодветна документација за вршење на угостителска дејност издадена од Министерство за економија на Република Македонија , додека од страна на УЈП во два угостителски објекти констатирана е разлика во прометот во готово и прометот во фискалните каси, по што на истите им е изречена забрана за вршење дејност во траење од 15 денови.
Регистрирано е и едно кривично дело „Напад врз службено лице при вршење на работи од безбедноста“ при што се повредени двајца полициски службеници.
Како што информира МВР, при приведување поради сомнение за претходно нарушен јавен ред и мир, лицата С.М (34) и Б.С (18), двајцата од Скопје физички ги нападнале униформираните полициски службеници, при што им нанеле телесни повреди.
Лицата се лишени од слобода и против истите ќе биде поднесена кривична пријава по член 383 од КЗ на Република Македонија.
За спроведувањето на акциските контроли, како што информираат од МВР, направена е претходна проценка за бројот на присутни лица, како и околностите во кои тие се спроведуваат, заради што се ангажирани соодветен број на полициски службеници кои постапувале согласно процедурите и законските одредби. Доколку се воочат евентуални недоследности, Одделот за внатрешна контрола и професионални стандарди ќе превземе соодветни мерки.