Алтернатива го отфрла предлогот на Мицкоски кој побара Гаши да биде мандатар
Објавено во: Македонија 17 Декември, 2021
Алтернатива го одби предлогот на ВМРО-ДПМНЕ. Станува збор за предлогот на лидерот на ВМРО-ДПМНЕ Христијан Мицкоски, претседателот на Алтернатива Африм Гаши да биде мандатар за состав на нова Влада, наместо новиот лидер на СДСМ Димитар Ковачевски.
Овој предлог за Алтернатива е неприфатлив од причина како што велат за МИА, партијата е дел од еден друг процес.
„Му благодариме на Мицкоски за изразената почит кон претседателот Африм Гаши, но Алтернатива моментално е во еден процес кој е во тек и се уште не е завршен. Во овој период немаме причина и не можеме да зборуваме за ништо друго“, изјавија од Алтернатива за МИА.
Мицкоски, денеска на прес-конференција изјави дека на ДУИ и нивниот лидер Али Ахмети им предлага преку најмалку 61 пратенички потпис да ја поддржат идејата Гаши да биде мандатар за состав на нова Влада, наместо новиот лидер на СДСМ Димитар Ковечевски. Тој ја повика и опозицијата на Албанците да го поддржи ваквиот предлог за премиер Албанец. Алијанса за Албанците со брза реакција најави дека ќе даде поддршка за евентуалниот ваков предлог. Но, за ДУИ ова не е прифатливо.