АМАНДМАНИ ЗА ПРЕДЛОГ - ЗАКОНОТ ЗА УПОТРЕБА НА ЈАЗИЦИТЕ: ВМРО-ДПМНЕ достави дури 84

Добивај вести на Viber

До Комисијата за европски прашања пристигнаа 90 амандмани за предлог-законот за употреба на јазиците од кои дури 84 од ВМРО-ДПМНЕ.

СДСМ поднесе 4, Движењето БЕСА 2, a ДУИ не поднесе ниту еден амандман. 

„За нас е исклучително важно заеднички да дојдеме до законско решение кое навистина ќе биде во интерес на сите граѓани во оваа држава“ - изјави Томислав Тунтев од СДСМ.

СДСМ поднесе амандман и за намалување на висината на казните што беа наменети за институциите што нема да го почитуваат законот.

„Според нашиот предлог казните од 4.000-5.000 евра се намалуваат на 1.000-2.000 евра. Потоа исто така ја допрецизираме регулативата при водењето на седниците во Собрание и во Влада“ - рече Тунтев.

Бидејќи законот е со европско знаменце, според деловникот тој сега треба да биде вратен во Комисијата за европски прашања. Амандманската расправа е закажана за утре и ќе трае три дена по што законот повторно ќе биде вратен на пленарна седница.

За изгласување на законот потребни се 61 пратеник. Според најавите на Претседателот на Собранието, Талат Џафери, целата процедура треба да заврши до крајот на декември. 

Премиерот Зоран Заев побара, ова прашање поврзано со спроведување на албанскиот јазик во институциите да биде затворено до крајот на годината.