Анѓушев: Ситуацијата е под контрола, нема да има ценовен хаос

Добивај вести на Viber

Вицепремиерот за економски прашања Кочо Анѓушев денеска одговарајќи на новинарско прашање на Македонскиот енергетски форум 2019 во Струга рече дека ситуацијата е под контрола и нема да има ценовни шокови во малопродажбата на горива а така очекува да биде и во иднина со стапувањето на сила на Законот за енергетика кој беше донесен пред точно една година но ќе стапи в сила откако денес најверојатно ќе го потпише претседателот Стево Пендаровски.

„Очекувам денеска претседателот Пендаровски да го потпише овој закон со кој во иднина ќе се регулираат многу подрачја, а исто така потпис да се стави и на методологијата на регулирање на малопродажните цени на нафтата и нафтените деривати. Не ми се допаѓа единствено тоа во моментов што 80 отсто од снабдувањето оди преку една компанија, така што очекувам да се подобри конкурентноста во иднина. Покрај тоа остануваат максималните цени кои што ќе може да ги определат компаниите. Но ние деновиве видовме дека и слободниот пазар добро функционира, се раководи според цените на берзата и тоа покажува дека во Македонија постои пазарна конкуренција“, изјави Анѓушев во Струга.

За самиот закон рече дека Македонија ќе ја направи енергетски перспективна земја и транзицијата кон обновливи извори на енергија со истиот ќе биде успешна, бидејќи во моментов земјата се потпира со 70 отсто од ресурсите на јаглен, а генерално ја обезбедува РЕК Битола.

„Потребни ни се 200 мегавати преку фотоволтаици кои ќе ги обезбедиме преку три циклуси на доделување на државно и приватно земјиште. Ќе се понуди урбанизирано земјиште со сите дозволи. Цената на приклучокот ќе биде однапред позната и инвеститорите ќе ги знаат сите ризици однапред. Она што нема инвеститорот да го продаде на слободниот пазар ќе му го купи државата, која и онака ќе заштеди многу со тоа. Очекувам голем интерес на првата тендерска постапка“, рече вицепремиерот.

Наведе дека во иднина 200 мегавати ќе се обезбедуват од фотоволтаици кои ќе се поставуваат на места како Македонски Брод, но ќе ги инсталира и самиот РЕК Битола. Покрај тоа се очекуваат и дополнителни 150 мегавати од други извори.

„Во Македонија во моментов има 75 хидроелектрани, 35 се градат, а донесена е владина одлука за лиценци за уште 18 во кои нема да влезат оние што конкурираа за Маврово бидејќи тоа е заштитено подрачје. Во моментов од вакви нефосилни ивори имаме само 17 мегавати, но во иднина треба да бидат 350“, истакна Анѓушев.

Ги повика инвеститорите да не се колебаат кај фотоволтаиците и дека ќе има обврзани трговци кои што ќе треба да им ги купат вишоците на енергија, а заработката би била од 60 до 80 евра по мегават час.

А.К.