Анѓушев: Со спроведување на економските политики на владата ќе има крај на транзицијата и старт на одржлива економија на долг рок

Добивај вести на Viber

„Јас го гледам крајот на транзицискиот период и јасно ми е како тој изгледа. И сакам да им дадам надеж на македонските граѓани дека доколку се спроведат сите економски политики на владата ќе има крај и излез од транзицијата“, рече вицепремиерот за економски прашања во Отворено студио на 1ТВ.

„Проблемот во Македонија е врзан со светската криза. Треба да тргнеме од самиот период на приватизацијата. Тој период не беше поминат најдобро и рецидивите од тој период ги чувствуваме и денес. Некои приватизации беа добро направени, но некои не и доста капацитети пропаднаа. Токму заради тоа државата се уште не може да го достигне индустрискиот раст или нивото на индустриското производство“, објасни Анѓушев.

За неопходните промени што и се потребни на државата, Заменик претседателот задолжен за економски прашања со јасно дефиниран план како треба да се одвива економскиот раст.

„Излезот за Македонија е во две работи, првата е да заборавиме на проекти со коишто сериозно ќе ја задолжиме државата, односно земање 3 милијарди евра кредити, коишто ќе ги потрошиме на нефизибилни градежни проекти и со тоа ќе направиме некаква градежна експанзија која што никому не треба и не е физибилна, ќе ја задолжиме државата а притоа ќе набилдаме градежништво и БДП. Од друга страна градежништвото е многу корисно ако е во физибилни, исплатливи проекти а тоа се проекти во инфраструктура, точно она што сега ние го правиме. Но, двигател на долг рок е индустријата, земјоделието, трговијата. Во индустријата ни недостига продуктивност. Ако зборувате за индустрија во Република Македонија, не може да се зборува за домашен пазар, затоа што е мал пазар. Затоа ние мора да размислување за извозно ориентира индустрија, а за таква индустрија тогаш зборуваме за конкурентност. Таа индустрија мора да биде конкурентна, продуктивна. А основните фактори за продуктивност се да има пристап до технологија, до know how, знаење и да биде добро организирана“, заклучи Анѓушев.

Како една од индустриските гранки каде што Македонија треба да го гледа и спроведе својот економски раст е и земјоделието. Наспроти во изминатите години кога се трошеа стотици милиони евра на субвенции а сепак имаше паѓање извозот а се зголемуваше увозот. Затоа, потенцираше Анѓушев, во овие два сектори, градежништвото и земјоделието потребно е да се направат промени.